Act 5 | BJR | STEP | Yísuna ufa íri marúsakiqari faiqí moo áuqu Ananiasafa márinau. Miná ánaaqa áuqu Safiraa námmarifa márinau. Ananiasafa narí maqá moosá nimiséenoo feefaurú minásaa maraséenoo naríaraa qumeé dínni rainá quqáseenoo dínni máreenoo Yísuna faiqi námu niqiqoosa nímida maaqí qímasee únna ufa qinau, aiqáma munnimma nímidaqee qianau. Narí ánaaqandira moodáa ufa qímasee miqí qinau.

Acts 5

Ananiasafa faqa Safiraa námmarifa faqa nári munnimmara únna qímasee kúqiqau.

1 Yísuna ufa íri marúsakiqari faiqí moo áuqu Ananiasafa márinau. Miná ánaaqa áuqu Safiraa námmarifa márinau. Ananiasafa narí maqá moosá nimiséenoo feefaurú minásaa maraséenoo naríaraa qumeé dínni rainá quqáseenoo dínni máreenoo Yísuna faiqi námu niqiqoosa nímida maaqí qímasee únna ufa qinau, aiqáma munnimma nímidaqee qianau. Narí ánaaqandira moodáa ufa qímasee miqí qinau.

3 Ánutufa dadaaqufanóo Peetooroofa fáasai iriséenoo mi-munnimmána qáfamaseenoo qinau Ananiasa nánaree anée eedóo qíananoo fee Sadannafa aní ámuqusa qumáraifanee únna ufa qídanee. Anée Ánutuna náaquqara maraquna únna ufa qímamiananoo aneenná munnimma áti únna qímaseenana kukéeqasaannánara. 4 Mi-maqáfa aníndi máruna nímunanoo kafáa mi-munnimmáfa aníndi kai máridanoo. Anée aneennára munnimma áti rafáaqafinanoo amaná andeeqánoo máridanoo. Aneenná áaqeenana anée únna ufa qímasee aiqáma ními fee qíannana, nánaree aneenná aunduráki mandáinainara írinanee. Anée sía faiqífau únna ufa qímannimiananoofau. Ánutuna únna ufa qímamiananoo. 5 Ananiasafa mi-ufána írinoo dóo miqóokai tautúmasee kúqinau. Moómoosa mi-ufána íriqa káaqa rufíaqau. 6 Kumaaráauqa mi-maqánaki kéeqafufaqa qamunannái Ananiasana irí kukúqamamaree mara máree maqáki ákundaqau.

7 Káqikaaqoo márinoo Ananiasana ánaaqa Safiraa námmarifa Peetooroofa máru maqanaki ururéenoo sía narí afaaqi kúqunara írinau. 8 Máaqaki ururoofanoo Peetooroofa irámaseenoo qinau. Kúqaa fee aní maqásaa munnimma aní afaaqi aiqámee qíminoo fee. Miqí qufanoo Safiraa námmarifa mifá faqa kai únna qínoo qinau eeóo aiqáma uqanna ínni níminoo. 9 Peetooroofa miná iriséenoo qinau. Náqaa fee ifanée aneenná afaaqi faqa moodáa ufa qímasee fee únna qímasee Ánutuna maraquna amanídanee. Miqíannanara dóo kumaaráauqa uru máridaqa. Aní afaaqi dóo maqee kuqufifaqá dóo múqu ákundamaseeqa anée faqa maqee kúqinaqa miqóo miná aaqá ákundeefara.

10 Miqí qímasoofanoo Safiraa námmarifa Peetooroona áikunni dóo tautúmasee kúqinau. Mi-kumaaraasá miqóo ururéeqa uru miná qáfeeqa mara máreeqa narí afaaqi aaqá kai ákundaqau. 11 Miqímasoofaqa Yísuna faiqi námu faqa akaqáusa namufaqa minára íriufanoo káaqa náaquqee márinau.

Yísuna faiqi námu faiqí ánaasee ámiqimánnisaqau.

12 Yísuna afaaqasáa aqoondiuqa niqiqoo fásiqausa misá moómoo ainaina mookíra mookíra ainaina faiqí dadaaqíra ainaina kai áuqimarufaqa misá qáfeemaríqau. Yísuna ufa írimarusa moodáaqoo náaquqara amaana maqa aaqá Sooroomoona tidá átinni maqee maqee innaaru qírara súqimariqau. Sooroomoona tidá atinni kísaaqa márunara faiqí moómoo súqimariqau.

(Sooroomoonafa óoqai kuqufinau. Yeerusaree amaana máqakina miná áuqu quqáqoo tidá átinni káqi márufaqa minakí kéeqafi qúsimaríqau.)

13 Yeerusaree máqusanaasa faiqí ánaasee káiqeesa Yísuna ufa írimarusara ámiqirausee qímasaidaqa Yuda máqannaa úriqararausara rufíasaida maasá faqa dári foo qímasee sía Yísuna ufa írimarusunnai misá máruqoo animáriqau. 14 Faiqí faqa ánaasee faqa moómoosa faasaambáasaana Yísunasaa írirana rusísoosa sía úriqararausara rufíaqau nifaaqa quqáseeqa niqiqoo fásiqausasaa atooqáfi nímariqau. 15 Yísufa niqiqoo fásiqausa moómoo faiqí dadaaqíra ainaina áuqee márufaqa faiqí ánaasee miná qáfamasee náriqa máaqakiaqa faiqí aurúsa faqa mandáikusa faqa dinee quqoosa faqa qaindúsumaree aanásaa qaarí qamunna ufíqiseeqa miqóo quqée maríqau. Miqímasoofanoo Peetooroofa aatáta fímarufanoo miná amana fannoo misá mandaaqóofaqa aurírafa teeroo taikáani fee qímasee míni quqée máriqau. Peetooroofa moómoo andeeqánnisaidanoo óonauqee ánauqee maasáindi sía amanaikíandoora qímasee aanásaa quqée maríqau. 16 Faiqí ánaasee Yeerusaree dínni dínni márufaqa nári aurí marúsa faqa fuéenaikí marúsa faqa nífiqaida niqiqoosá máruqoo quqásoofaqa aiqáma uqanna idaaqamánnisee maríqau.

Amaana máqasaa rakísirausa Yísuna faiqi námu unnaanásamu náriqau.

17 Amaana máqasaa aanáiqikirafa úriqararafa Sadikai ámaana ufa qímarufa narí aqoónausa faqa Yísufa niqiqoo fásiqausa áuqu ainainara káaqa rairaa qídaqa misá maaqí qiqau faiqí ánaasee maasá minnísee misíannai atooqáidaqa. Sáinaqa maasá misá rumbáanaura. 18 Miqí qímaseeqa misá Yísuna faiqi námu niqiqoo fásiqausa maréeqee karabúsaki quqáqau.

19 Miqímasoofanoo eendákina Ánutuna qangiroo moó fannoo qumuréenoo íreeda karabúsa kooqí atúaseenoo niqiqoo fásiqausa aiqáma maréeqeenoo mádaanai quqánau. 20 Quqáseenoo maaqí qímasee qímanniminau. Ínnee fáfaa iqáqainaqa náaquqara firaa amaana maqaki kéeqafi kikíqiaqa. Miqí mámbiqa maa-fuka mariránara Yísuna ufamáu fíranara faiqí ánaasee naamúaqimannimiaqa. 21 Niqiqoo fásiqausa iriséeqa eedóo qímasee iqáqoofaqa amaana máqaki kéeqafuafaqa faiqí ánaasee Yísuna fasáasa qímannimiqau. Qímannimimárufanoo amaana máqasaa rakísirafa aanáiqiki márufa mifá faiqí firaasá kanasóorauqa faqa moómoo aiqáma suqú quqáseenoo Yísuna faiqi námu karabúsaki káqi máriaa foo qímasee amaana máqasaa rakísi marú poorísausa niqiqéenoo ínnee karabúsakinaasa Yísuna faiqi námu niqiqoo fásiqauqa idukúsee nífiqee úruaqa. 22 Poorísa karabúsa maaqai óoquree randásee qáfoofanoo sía máriqau. Óoqurandee kansóorauqa suqímarunaki kéeqafinoo qímanniminau. 23 Maasá karafúsa máaqaki óoquree ámiqimasee qáfaunanoo kooqí ámiqimandee mundínoo máriinoo kooqíki mária poorisáusa faqa kikíqiqa máridaqa rakísidaqa. Maasá kooqí atúasee qáfaunanoo sía faiqí moó fannoo minakí máridanoo. 24 Amaana máqa poorísauqa rakísirafa faqa aanáiqiki márusa faqa miná iriséeqa misára óonu máfi iriséeqa randáqau. 25 Misá miqímasee randée márufanoo faiqí moó fannoo aniréenoo qímanniminau. Ínnee íriaqa eendá karabúsa máaqaki quqáasa misá amaana máqaki kikíqiqa máridaqa faiqí ánaasee naamúaqira ufa qímannimidaqa.

26 Miqí qímasoofaqa poorísa rakísirafa narí poorísauqa faqa amaana máqaki óonuree óonu íreeda kai niqiqoo fásiqauqa amaana máqakinaana nífiqee ániqau. Áranaiqi óonu misá nífiqee ánianaqa faiqí ánaasee minakí márusa óonisamu ainnasámu qumáree dárifoo qímasee íreeda kai óonu nífiqee ániqau.

27 Nífiqamaree mini súqimaru kansoorausa nífusaa kikíqamasaqau. Amaana máqasaa aanáiqiki márusa úriqararafa misá mara quqásee qímanniminau. 28 Maasá ámiqimandee andeeqásee ínni qímannimunaqa sía mi-fasiqáfa Yísufa kúqunara qímannimiaqee qúnaqa dóo ínnee maasá ufa rukíaseeqa aiqáma qímannimiafaqa. Ínnee Yeerusaree máqannaasa aiqáma qímannimisaafaqa misá aiqámausa quándakiqa mi-fasiqána áruana ákiaqara miná numóo maasáki quqáraree qímariafaqa. 29 Peetooroofa mi-ufána iriséenoo maaqí qímasee qímanniminau. Ínni faiqí ufamáu sía fuanáura. Maasá Ánutuna ufamáu kai fídaqa faiqí ánaasee qímannimianaura. 30 Ínnee Yísuna aunírira saqarisaa pirímmannai kuqárusoofanoo maasá qikeekú qikaakú misá Ánutufa miná kúqiranakinaana mara fíndifumasoofanoo máridanoo. 31 Ánutufa miqóoqaraana maréeqeenoo narí aaqá innaarúnai quqásoofanoo maasá Isaraee máqannaa rakísirana faqa asumu máreemarina faqa máridanoo. Ánutufa Isaraee máqannaara nári mandáinainara nímeesuqusee rukáaqeera miqínau. 32 Ánutuna ufa irisée mi-maú fímariasa Ánutufa narí náaquqara andeeqara maraquna káqi misá nímidanoo. Mi-naaquqara andeeqara maraqunná faqa maasá faqa Yísuna fíndifuna qáfaafanausa máridaqa qímannimidaqa.

33 Ufa súqimarusa faiqí firaasá misá Peetooroona ufa iriséeqa firaa aanoommáseeqa náruaneera ufanóo misákiqari moó fannoo Mooseena sándufa akoofása fasiqa miná áuqu Kamarieerafa faiqí ánaasee minára káaqa írirana faqaa fée qímariqau. Mi-fasiqáfa ufa súqimarunakiqari fíndifinoo nárirana qáoo qímaseenoo maasá nári kai ufa qianáuree qímasee Yísuna faiqi námu niqiqoofaqa moosáa fiqau. 35 Misá fufanoo Kamarieerafa ufa súqimarusa maaqí qímasee qímanniminau.

Isaraee máqannaa fasiqauqa ínnee íriaqa. Maa-fasiqáusa sía aaqee nárirariaqa iriséeqa miqóo andeeqáaqa. Moómoo ufa rukíee máriasa maasáki máriusa márufaqa ínnee misá óosana írimarusa máriafanoo. 36 Óoqai faiqí moo áuqu Teeudasafa mifá naríaraa firaasée qímasoofaqa 400 (foo handareeta) fasiqa moómoo fasiqa minásaa atooqáqau. Rákiranaki mi-fasiqáfa taikóofaqa miná áiku ásauku miqóoqari dáraanimambufanoo taikánau. 37 Miqóoqari Roomma máqannaasa aiqámausa núqu mároo aukuana faiqí moo áuqu Yudasifa Yudasina amaráfa Kariree máqannaafa mifá faiqí moómoo maraséenoo Roomma máqannaa kaamánnara qíkooqaifaqee qímasee misákinaana rakéeianauree qímaseenoo, rákiranaki kúqufaqa miná áiku ásauku miqóoqari dáraanimambiqau. 38 Kafáa maqeera ínni qímannimidaqa. Sía maa-fasiqáusa náruaqa. Sáifaqa káqi maríaqa. Misá úfa misá márirafa misá nírafa fífau faiqí ufa márinoo narí kai taikáani. 39 Ánutuna ufa márinoo ínnisaimbaqa sía miná amana rafáaqa fúanaura. Ínnee Ánutuna faqa rákifoora.

40 Misá aiqámausa Kamarieerana ufa iriséeqa mi-maúkaimbiqau. Misá Yísuna faiqi námu kafáa náaroofaqa aniroofaqa Yísuna áufakiana qímannimiranara qáoo qímasee unnaaná sámu moómoo kari náriiseeqa idukúsoofaqa fiqau. 41 Yísufa niqiqoo fásiqausa nídafimarufaqa fídaqa sía nóori runíqau asasámmiqau. Misá Yísuna áruandeemásee maasá faqa dáruafanoo Ánutufa minánnai maasá maréeqeenoo Yísuna amanakái mundúsaifaqa minára maasá asasídaqa. Yísunasaara maasá dáruafaqa asasídaqa. 42 Miqóoqari Yísufa niqiqoo fásiqausa sía taikéeqa faasaambáasaana firaa amaana máqaki faqa máaqakiaqa faqa Yísuna ásauku mundírana Yísuna áufakina ámiqira fasaasa ufa suqúsaida qímannimimariqau.